時：深夜
地：即將動工的西九文化區
人：明、邦、傑
（西九文化區動工前最後的裝置藝術展覽，大型展品的黑影在夜裡如妖魅般張牙舞爪。明、邦、傑穿著保安員制服。明雙手叉腰，抬頭，面向維港。傑借著街燈在看書。邦坐膠椅，雙腿擱欄杆，睡著。）
明：（忽然向著海大叫）呀──
邦：（被嚇醒，幾乎跌倒）做乜事呀？
明：（指著）你地話由呢度游過去中環要幾耐丫拿？
（傑瞄一瞄對岸，視線又回到書上）
邦：鬼知咩！
明：你以前教過人游水架喎。
邦：教o者，又唔係自己游，你估仲後生咩。
明：係，唔後生lu。
（一靜。明轉向展品。）
明：嘩，呢Ｄ乜野黎架？
傑：（仍看著書）裝置藝術。
明：我知，我係話表達緊D乜野。
邦：話係乜野“開花結果”喎。
明：睇唔出喎。
傑：做埋呢個月咋，下個月就動工起西九喇。
明：起拿？嘩，由我地畢業話起，話起，起到宜家先起。
邦：超！宜家都唔關我地事喇！
傑：都唔係架，我地宜家咪看住Ｄ藝術品囉，猛車邊都叫做有Ｄ關係。
明：呢邊係咪起大劇院呀？
傑：唔係，呢邊起豪宅，果邊先係起劇院。
明：呢邊大Ｄ喎。
傑：呢邊個view靚Ｄ呀嘛，梗係起豪宅喇。
邦：果邊仲有好多地喎。
傑：果一邊就係連住高鐵既商場，果個角落就係 ”M” 乜鬼野博物館囉。
明：又話做到乜野中央公園既？
傑：o係中央種兩行樹咪公園囉。
明：咁都得？
邦：唉，講咁多做乜丫，講黎講去，家下都唔關我地事喇。
明：咁呀係──
（一靜。各回原位。明無無聊聊行到傑旁邊。）
明：睇乜呀？
（傑把封面轉向明）
明：「高行健劇作選」！
邦：嘩！駛唔駛呀？
明：你唔睇埋「演員自我修養」添。
傑：我無丫嘛。
邦：（取過來翻看）咁你又買高行健？
傑：唔係買架。
明：送架？
傑：係呀，以前訂報紙送架。
邦：送高行健？
傑：仲有其他揀既，書展果陣擺一堆o係度，任Ｄ訂戶自己揀囉，總之都係Ｄ倉底貨喇。
明：哦。
邦：我前兩日見你睇果本書無咁厚過喎？
傑：果本係「尊重表演藝術」。
邦：又係送架？
傑：唔係，買既。以前買埋買埋，影埋影埋又唔睇，家下好喇，大把時間，（環視四周）風涼水冷，咪攞返出黎打發時間囉。
邦：（遞回）拿，打發時間呀。
傑：（接過）你地下個禮拜係咪都要去會展當更呀？
明：係呀，點票中心丫嘛。
邦：好似要踩成日過喎。
傑：我要遲Ｄ先返到呀。
明：做乜呀？
傑：投票。
邦：我無投好耐喇，選舉果陣就嗌晒咪，之後就唔見左人。淨係識得掛Ｄbanner出黎成功爭取乜乜物物。
明：你果區有邊Ｄ人候選呀？
傑：都係果幾個喇，不過我仲要投功能組別。
明：邊個功能組別呀？保安界呀？
傑：雖然我個人o係保安界，但係個心仲o係文化界架。
邦：文化界？你係文化界選民？
傑：係呀。
明：好難先做到過喎。
傑：唔係呀，好易咋嘛。
明：有幾易呀？
傑：首先自己去註冊個團體，跟手去申請政府Ｄ場地做展覽，最緊要申請埋場地資助，咁就可以登記做選民架喇。
邦：乜野展覽呀？
傑：攝影展。
明：攝乜野？
傑：野食囉，我最中意影野食架喇。
明：野食相都得？
傑：得，乜唔得，無露點就得架喇，佢地唔理架，總之你貼到野出黎，就係文化界架喇。
邦：咁多年你都係咁無聊架。
明：唔係丫，有得投，好過無得投丫。
邦：有得投又點丫，投完咪又要著返件馬騮衣。
（一靜。各回原位。天空藍光漸現。）
明：唉，又一day，就快收工。喂，有無野食呀？
傑：無呀。
邦：（從膠袋取出香蕉）食唔食呀？
明：蕉？
邦：咁食唔食丫？
明：食。
傑：我都要。
（邦分蕉。人手一蕉。三人望望手上的蕉，再望望身上的制服，眼神交流，苦笑，如香檳舉杯般輕輕舉一舉，點點頭。轉身向著維港，剝蕉皮，一啖一啖慢慢吃起來。晨光第一線。）
（完）
留言列表
